李璨琛感恩囡囡助網民抗抑鬱 4歲元元重51磅爸爸拒控制飲食

李璨琛（Sam）同老婆梁志瑩育有4歲女兒李元元（Lucy），Lucy媽不時於社交平台分享元元啲古靈精怪嘢，係唔少網民嘅開心果，人氣分分鐘仲勁過爸爸呀！Lucy嘅人氣仲遠及馬來西亞，日前Sam接受大馬電台訪問，宣傳新電影之餘亦分享自己做爸爸嘅心路歷程。

同場加映： 360秒人生課堂丨林盛斌高EQ全靠人生經歷累積 豁達面對負評意外為仔女「打底」

{{hket:ul-video id="5606"}}{{/hket:ul-video}}

李璨琛喺囡囡出世之後多次離開香港工作，近月終於留港工作，為ViuTV拍攝劇集。電台主持問到李璨琛Lucy爆紅對佢一家有咩影響，李璨琛就話自己冇咩大感覺，因為佢本身都係藝人：「其實我太太開始幫Lucy整呢個IG嘅時間都冇諗住有呢個效果，係諗住幫佢成長過程留番啲回憶，到佢大個之後送番畀佢。」佢話冇諗過會有咁多人睇：「因為我老婆寫啲嘢好無聊，我個女又亂嚟，佢兩個都係亂嚟。」

{{hket:inline-image name="275851613_660165648564496_2660615809752831916_n.jpg"}}{{/hket:inline-image}}

李璨琛囡囡又講到Lucy做過令佢感到最amazing嘅事情，甚至對佢做戲都有所啟發：「你會睇到佢啲DNA，佢做啲表情、動作，『嘩！咁你都做得出嘅？』我都冇過呢個表情，某程度都啟發到我，呢個表情，正喎！爸爸都要跟你學嘢。」李璨琛話暫時冇因為Lucy爆紅而有壓力，因為街上嘅人見到Lulu都係好友善咁打招呼。講到粉絲們要求合照嘅時候，Sam就話佢都會尊重Lulu（Lucy）自己嘅意願：「佢有時想就影，唔想影都冇辦法，因為小朋友（控制唔到佢）。都會好禮貌咁拜拜姨姨，希望教識佢基本禮貌，由細到大都灌輸佢，你哋有禮貌同你say hello你唔可以唔理人呀，同埋要望住人講嘢。」

佢又表示自己嘅職業都係娛樂大家，都好感恩Lucy可以帶歡樂畀大家：「都要佢有呢個talent，唔係，應該話有呢個傻氣、傻福先得，佢又唔係刻意做出嚟，佢諗到就做，百分百發自內心。我太太好多人send msg畀佢，話睇完Lulu個IG好放鬆，好開心，令到佢可以釋放壓力，我都覺得好開心，無形中幫到人唔使做啲好辛苦嘅嘢。」

之前Lucy買完嘅校服一次都未着已經唔啱身，光速脹大，有唔少網民都好關注Lucy體重。李璨琛大爆囡囡而家有26吋腰兼重51磅，仲要着8-10歲嘅童裝，不過李璨琛就話一切順其自然：「小朋友，冇得話夾硬逼佢肥或瘦，總之佢開心食得幾多得幾多，或者佢鍾意做咩就呢段時間畀佢做，佢做得唔啱就同佢講咩係錯，都要畀佢自己探索。」

圖片來源：Instagram